శ్రామిక, సోషలిస్టు మహిళల పోరాట ఫలితమే మార్చి 8 అంతర్జాతీయ మహిళా దినోత్సవం…
సామాజిక ఉద్యమనేత సంకు మనోరమ
అంతర్జాతీయ మహిళా దినోత్సవం (మార్చి 8) ఆవిర్భావం వెనుక శ్రామిక మహిళలు, సోషలిస్టు మహిళల పోరాటం వారి కృషి వెలకట్టలేనిదని సామాజిక ఉద్యమ నేత సంకు మనోరమ అన్నారు. శనివారం తణుకు వంక సత్యనారాయణ సురాజ్య భవన్ లో ఏపీ మహిళా సమాఖ్య( ఎన్ఎఫ్ఐడబ్ల్యు) ఆధ్వర్యంలో అంతర్జాతీయ మహిళా దినోత్సవం ఘనంగా నిర్వహించారు.తొలుత మహిళా సమాఖ్య పతాకాన్ని మనోరమ ఆవిష్కరించారు.
అనంతరం ఏపీ మహిళా సమాఖ్య జిల్లా ప్రధాన కార్యదర్శి సికిలే పుష్పకుమారి అధ్యక్షతన జరిగిన సభలో మనోరమ, పుష్పకుమారి,
ప్రముఖ మహిళా వైద్యురాలు డాక్టర్ వంక వసుంధర, చేనేత కార్పొరేషన్ మాజీ చైర్మన్ వావిలాల సరళాదేవి, సీపీఐ జిల్లా కార్యదర్శి కోనాల భీమారావు, పట్టణ కార్యదర్శి బొద్దాని నాగరాజు మాట్లాడుతూ మహిళా దినోత్సవం కేవలం వేడుక కాదని శ్రమశక్తిలో మహిళల సమానత్వం కోసం జరిగిన ఒక గొప్ప రాజకీయ ఉద్యమం అన్నారు. మహిళా కార్మికులకు మెరుగైన వేతనాలు, సమానపనికి సమాన వేతనం, ప్రసూతి సెలవులు, పని గంటల తగ్గింపు, ఓటు హక్కు,ప్రసూతి సెలవులు, లింగ వివక్షతకు వ్యతిరేకంగా సమానత్వం సాధన కోరుతూ శతాబ్ధానికి పైగా శ్రామిక, సోషలిస్టు మహిళలు చేసిన పోరాటాల ఫలితంగా మార్చి 8 అంతర్జాతీయ మహిళా దినోత్సవం ఆవిర్భావం జరిగిందన్నారు. జర్మనీకు చెందిన సోషలిస్టు ఉద్యమ నేత క్లారా జట్కిన్, రోసా లక్సెంబర్గ్ లాంటి కమ్యూనిస్ట్ మహిళలు అనేక అంతర్జాతీయ వేదికలపై మహిళలు అణచివేత,వివక్షత, శ్రమదోపిడీ, అధిక పనిగంటలపై తమ గళాలు విప్పి ఉద్యమించారన్నారు. వీరి పోరాటాలు ఫలితంగా ఐక్యరాజ్యసమితి 1975లో మర్చి 8 న అంతర్జాతీయ మహిళా దినోత్సవంగా ప్రకటించిందనన్నారు.
మహిళా దినోత్సవానికి అంతర్జాతీయ గుర్తింపు తెచ్చిన ఘనత జర్మన్ సోషలిస్టు నాయకురాలు క్లారా జెట్కిన్ కు దక్కుతుందన్నారు. దేశంలో మహిళలకు చట్టసభల్లో 33 శాతం రిజర్వేషన్లు సీపీఐ ఎంపీలు గీతా ముఖర్జీ, రేణుచక్రవర్తి లాంటి మహిళా నేతల సుదీర్ఘ పోరాటాల ఫలితమేన్నారు. తొలుత మహిళా బిల్లు పార్లమెంట్ లో ప్రవేశ పెట్టి రాజ్యసభలో ఆమోదింప చేసిన ఘనత గీతాముఖర్జీదే నన్నారు. మహిళలపై ఇంకా కొనసాగుతున్న దాడులు, అత్యాచారాలు,వివక్షతలకు వ్యతిరేకంగా సమానత్వ సాధన దిశగా మహిళలు సంఘటితంగా ఉద్యమించాలన్నారు. మహిళా సమాఖ్య నాయకులు సావారపు దేవీ,పిండి సత్యవతి, పట్టపు కృష్ణవేణి, దుర్గ, లక్ష్మి,మీసాల జయలక్ష్మి, కవల మంగతాయారు తదితరులు పాల్గొన్నారు.
